அன்றைய காலகட்டத்தில் உள்ளாட்சி நிர்வாகத்திலும் பொருளாதார முடிவுகளிலும் அம்பத்தூர் மக்களின் பங்கு எவ்வளவு முக்கியமானதாக இருந்தது என்பதை இது காட்டுகிறது.
சென்னையின் முக்கியத் தொழில் நகரமாகத் திகழும் அம்பத்தூர், ஆயிரம் ஆண்டுகளுக்கு முன்பே செழிப்பான நிர்வாக மையமாக விளங்கியது. தொண்டை மண்டலத்தின் புழற்கோட்டத்திற்குள், ‘அம்பத்தூர் நாடு’ என்ற பெயரில் பல ஊர்களை உள்ளடக்கிய பெருநிலப் பகுதியாக இது இருந்துள்ளது. ‘ஐம்பது ஊர்களின்’ தலைமை இடமாக இருந்ததால் இப்பெயர் வந்ததாகக் கூறப்படுகிறது. இங்குள்ள பழமையான கல்வெட்டுகள் அம்பத்தூரின் ஆயிரம் ஆண்டு கால வரலாற்றைப் பறைசாற்றுகின்றன.

முதலாம் உத்தம சோழன் மற்றும் ராஜேந்திர சோழன் காலத்திலேயே ‘அம்பத்தூர் ஊர்ச்சபை’ மிகவும் வலிமையோடு செயல்பட்டுள்ளது. கி.பி. 1018-19 காலகட்டத்தைச் சேர்ந்த திருமுல்லைவாயல் மாசிலாமணீஸ்வரர் கோயில் கல்வெட்டில், அம்பத்தூர் ஊர்ச்சபையினர் 4,000 குழி நிலத்தை விற்றுக் கோயில் நந்தா விளக்கு எரிக்க ஏற்பாடு செய்த செய்தி பதிவாகியுள்ளது. அன்றைய காலகட்டத்தில் உள்ளாட்சி நிர்வாகத்திலும் பொருளாதார முடிவுகளிலும் அம்பத்தூர் மக்களின் பங்கு எவ்வளவு முக்கியமானதாக இருந்தது என்பதை இது காட்டுகிறது.

சோழர்களைத் தொடர்ந்து பாண்டியர் மற்றும் விஜயநகரப் பேரரசுக் காலத்திலும் அம்பத்தூர் நாட்டின் செல்வாக்குத் தொடர்ந்தது. கி.பி. 1289-ஆம் ஆண்டு சுந்தர பாண்டியர் கல்வெட்டில் முகப்பேர் பகுதி அம்பத்தூர் நாட்டின் கீழ் இருந்ததாகக் குறிப்பிடப்பட்டுள்ளது. மேலும், கி.பி. 1520-ஆம் ஆண்டு விஜயநகரக் காலக் கல்வெட்டின் மூலம், அம்பத்தூரில் ஒவ்வொரு ஞாயிற்றுக்கிழமையும் பிரம்மாண்ட வாரச்சந்தை நடந்ததும், அதன் வரி வருவாய் கோயில் திருப்பணிகளுக்குப் பயன்பட்டதும் தெரியவருகிறது.

ஏரிகள், பசுமையான விவசாய நிலங்கள், கோயில்கள் என அமைதியாக இருந்த அம்பத்தூர், 20-ஆம் நூற்றாண்டில் நவீன மாற்றத்தைக் கண்டது. 1964-ஆம் ஆண்டு பெருந்தலைவர் காமராஜரின் முயற்சியால் அம்பத்தூர் தொழிற்பேட்டை உருவாக்கப்பட்டது. இதன் மூலம் வேளாண் கிராமம், ஆசியாவின் முக்கியத் தொழில் மையங்களில் ஒன்றாகப் பரிணமித்தது. தொடர்ந்து 1971 ஜனவரியில் பாடி, கொரட்டூர், முகப்பேர் உள்ளிட்ட பத்து வருவாய் கிராமங்கள் இணைக்கப்பட்டு அம்பத்தூர் நகராட்சியாக உருவெடுத்தது.

இன்றைக்குப் பரபரப்பான தொழிற்சாலைகளும் தகவல் தொழில்நுட்ப நிறுவனங்களும் நிறைந்த நவீன நகரமாக அம்பத்தூர் காட்சியளிக்கிறது. ஆனால், இதன் ஒவ்வொரு வீதிக்கும் அடியில் ஆயிரம் ஆண்டுகால உள்ளாட்சி நிர்வாகமும், ஊர்ச்சபைகளும், 500 ஆண்டுகளுக்கு முந்தைய வணிகச் சந்தை வரலாறும் புதைந்து கிடக்கின்றன.